ఎస్బీఐ వినియోగదారులకు హెచ్చరిక! ఇలాంటి వాటి బారిన పడకుండా.. వెంటనే ఇలా చేయండి!

Thu Dec 26, 2024 10:00 Business

టెక్నాలజీతో పాటు ఆన్ లైన్ మోసాలు కూడా పెరిగిపోతున్నాయి. ఆధునికతను అందిపుచ్చుకుంటూ దేశంలో ఆన్లైన్ మోసాలు చేసేవారి సంఖ్య వేగంగా పెరుగుతోంది. ఇటీవలి కాలంలో ఇలాంటి సంఘటనలు మరీ ఎక్కువయ్యాయి. ఈ నేపథ్యంలో తన కస్టమర్లకు దేశీయ దిగ్గజ బ్యాంక్ ఎస్బీఐ కీలక అలర్ట్ జారీ చేసింది. కొత్త టెక్నాలజీని ఉపయోగించి జనాన్ని మోసగించడంలో ఆన్ లైన్ కేటుగాళ్లు మరింత ప్రావీణ్యం సాధిస్తున్నారని, బ్యాంకుల పేర్లు చెప్పుకుంటూ లేదా డిజిటల్ అరెస్టుల పేరిట అమాయకుల నుండి లక్షల రూపాయలు దోచుకుంటున్నారని చెబుతూ సోషల్ మీడియా వేదికగా కొన్ని సూచనలిచ్చింది SBI. ఆర్టిఫిషియల్ ఇంటెలిజెన్స్ (ఏఐ) ఆధారిత డీప్ ఫేక్ వీడియోలు, వాయిస్ క్లోనింగ్, సోషల్ మీడియా యాప్స్ ద్వారా ప్రజలను మోసం చేయడం క్రమంగా ఆందోళనకర స్థాయికి చేరుకోవడం చూస్తున్నాం. ఈ మోసాలకు ప్రముఖులు సైతం బలవుతున్నారు. సచిన్ తెందూల్కర్, విరాట్ కోహ్లీ, అమితాబ్ బచ్చన్, రష్మిక వంటి సెలబ్రిటీలను టార్గెట్ చేస్తూ డీప్ ఫేక్ వీడియోల ద్వారా మోసాలకు పాల్పడుతున్నారు.

ఇంకా చదవండి: బ్యాంక్ లోన్ చెల్లించలేకపోతున్న వారికి భారీ శుభవార్త! ఇదొక్కటి చేస్తే చాలు!

ఎస్బీఐ వినియోగదారులకు హెచ్చరిక: తాజాగా, భారతీయ స్టేట్ బ్యాంక్ (ఎస్బీఐ) బ్యాంకు అధికారుల పేర్లతో వస్తున్న నకిలీ ప్రకటనలపై స్పందించింది. బ్యాంకు ఇన్వెస్ట్మెంట్ పథకాలు, పెద్ద మొత్తంలో రాబడులు అని చెబుతూ రూపొందించిన డీప్ ఫేక్ వీడియోలపై వినియోగదారులను అప్రమత్తం చేసింది. ఎస్బీఐ తన అధికారిక 'ఎక్స్' హ్యాండిల్ ద్వారా ప్రకటిస్తూ.. "SBI భారీ లాభాలంటూ వచ్చే వీడియోలు పూర్తిగా నకిలీవి. ఎస్బీఐ ఎప్పుడూ ఇలాంటి వాగ్దానాలు చేయదు. బ్యాంకు మేనేజ్‌మెంట్ పేరుతో వస్తున్న స్కీములు, డీప్ ఫేక్ వీడియోలను విశ్వసించకండి. ఇలాంటి వాటి బారిన పడకుండా జాగ్రత్తగా ఉండండి" అని తెలిపింది. వినియోగదారులకు ఎస్బీఐ సూచనలు: డీప్ ఫేక్ వీడియోల ద్వారా అందించే వాగ్దానాలను నమ్మొద్దు, బ్యాంకు అధికారిక ప్రకటనలకే అనుసరిస్తూ చర్యలు తీసుకోండి. అనుమానాస్పద సమాచారం లేదా వీడియోలు కనిపిస్తే, వెంటనే సంబంధిత అధికారులను సంప్రదించండి. తద్వారా, డిజిటల్ మోసాల ప్రభావం నుంచి తప్పించుకోగలరు.